བོད་དང་བལ་ཡུལ་གྱི་ས་མཚམས་ཏེ། བལ་ཡུལ་གྱི་མ་ནང་ (Manang) རྫོང་ཁོངས་སུ་ཆགས་པའི་བོད་དང་ས་འབྲེལ་གྱི་ཧིམ་ལུང་ཧི་མལ་རི་རྩེ་ནས་གངས་རུད་བརྒྱུགས་ཏེ་མི་བཞི་རྐྱེན་འདས་དང་། རི་འཛེགས་མཁན་དང་རོགས་པ་བྱེད་མཁན་མི་ ༡༤ ད་དུང་གར་སོང་ཆ་མེད་དུ་གྱུར་ཡོད།

ཁ་སང་ཕྱི་ཚེས་ ༢༧ ཉིན་བོད་ཀྱི་ས་མཚམས་སུ་འཁེལ་བའི་བལ་ཡུལ་གྱི་ཧིམ་ལུང་ཧི་མལ་རི་རྩེ་ནས་གངས་རུད་བརྒྱུགས་ཏེ། རི་འདབས་ཀྱི་རི་འཛེགས་མཁན་མི་གྲངས་ ༡༤ གར་སོང་ཆ་མེད་དུ་གྱུར་ཡོད་པ་དང་། མི་བཞི་རྐྱེན་འདས་སུ་ཕྱིན་པའི་གནས་ཚུལ་ཐོན་འདུག་ལ། དེ་ནི་ཉེ་ལམ་བོད་དང་བལ་ཡུལ་གྱི་ས་མཚམས་སུ་རང་བྱུང་གོད་ཆག་གི་དོན་རྐྱེན་བྱུང་ཐེངས་གཉིས་པར་གྱུར་ཡོད་པ་མ་ཟད། བལ་ཡུལ་གཞུང་གིས་ཧིམ་ལུང་རི་རྒྱུད་ཀྱི་དམའ་སར་གནས་པའི་མི་རྣམས་ནས་ཉེ་ལམ་གྱི་ཆུ་ལོག་ནང་བཞིན་ཞིག་བརྒྱུག་སྲིད་པར་དོགས་གཟབ་དགོས་པའི་སྐུལ་མ་བྱས་འདུག

དེ་རིང་བལ་ཡུལ་གྱི་མ་ནང་རྫོང་ཉེན་རྟོག་ལས་ཁུངས་ཀྱིས། ཐད་འཕུར་གནམ་གྲུ་སོགས་བཏང་སྟེ་བོར་བརླག་ཏུ་ཕྱིན་པའི་མི་རྣམས་འཚོལ་ཞིབ་དང་མྱུར་སྐྱོབ་ཀྱི་ལས་དོན་སྒྲུབ་མུས་ཡིན་སྐོར་བསྒྲགས་འདུག་ཀྱང་། བོད་དང་ས་འབྲེལ་ཡིན་པའི་བལ་ཡུལ་གྱི་ས་ཁུལ་ཁག་ཏུ་ཉེ་བའི་ཉིན་འགའི་རིང་ཁ་བ་མཐུག་པོ་བབས་ཡོད་སྟབས། འཚོལ་ཞིབ་ཐུབ་དཀའ་བའི་གནས་སུ་གྱུར་ཡོད་པའི་ཁར།  ལྷག་པར་དུ་ཟླ་སྔོན་མའི་ནང་རྒྱ་ནག་གཞུང་གིས་བོད་ཀྱི་ཕྱོགས་ནས་ཇོ་མོ་གླང་མའི་རི་འཛེགས་བྱེད་སྒོ་བཀག་སྡོམ་བྱས་ཡོད་སྟབས། ད་ལྟ་བལ་ཡུལ་ཕྱོགས་ནས་ཇོ་མའི་གླང་མའི་རིར་འཛེགས་མཁན་ཕྱི་རྒྱལ་བ་མི་གྲངས་ ༩༠༠༠ ལྷག་ལ་དཀའ་ངལ་འཕྲད་བཞིན་ཡོད་འདུག་ལ། ད་དུང་ཤི་རྨས་ཐེབས་པའི་མིའི་གྲངས་འབོར་འཕར་སྲིད་པའི་བློ་འཚབ་བསྟན་འདུག

གཞན་ཡང་། ཉེ་བའི་ཉིན་བཞིའི་རིང་བལ་ཡུལ་ནང་གནམ་གཤིས་ཡག་པོ་མེད་པའི་རྐྱེན་གྱིས། ས་ཕྱོགས་གང་སར་ཆུ་ལོག་དང་ས་རུད་སོགས་ཀྱི་དོན་རྐྱེན་འབྱུང་མུས་ཡིན་པའི་ཁྲོད་མི་གྲངས་ ༢༡ རྐྱེན་འདས་དང་། མི་གྲངས་ ༡༡ བོར་བརླག ཁྱིམ་ཚང་ ༢༤༧ གྱི་ཁང་པ་གཏོར་སྐྱོན་བཏང་བ། དེ་བཞིན། མི་གྲངས་ ༣༠༠༠ ལྷག་ཉེན་སྐྱོབ་བྱས་ཡོད་འདུག

བྷི་བྷི་སི་གསར་ཁང་གི་གནས་ཚུལ་ལྟར་ན། གཟའ་འཁོར་སྔོན་མའི་ནང་ཨེ་ཤ་ཡའི་རྒྱལ་ཁབ་མང་པོར་གནམ་གཤིས་འགྱུར་ལྡོག་གི་རྐྱེན་གྱིས་དཀའ་ངལ་འཕྲད་ཡོད་ཅིང་། དེའི་ཁྲོད་རྒྱ་གར་གྱི་ཨུ་ཊར་མངའ་སྡེའི་ནང་ཆུ་ལོག་བརྒྱུགས་ཏེ་མི་གྲངས་ ༥༦ རྐྱེན་འདས་ཕྱིན་པ་དང་། བྷན་ཀོག་གཞུང་གིས་རྒྱལ་ཡོངས་ཛ་དྲག་གི་ཉེན་བརྡ་བཏང་སྟེ། མི་རྣམས་རང་ཁྱིམ་དང་ས་བབ་མཐོ་སར་སྡོད་དགོས་པའི་ལམ་སྟོན་བྱས་ཡོད་འདུག

ཉེ་ལམ་ཕྱི་ཟླ་ ༨ པའི་ནང་བལ་བོད་མཐའ་མཚམས་སྐྱིད་གྲོང་དང་ར་སུ་ཝ་ཁུལ་དུ་ཆུ་ལོག་བརྒྱུགས་ཏེ། མི་གྲངས་ ༡༤༠༠ ལྷག་རྐྱེན་འདས་ཕྱིན་པ་དང་། མི་གྲངས་ ༦༠༠༠ ལྷག་གར་སོང་ཆ་མེད་དུ་གྱུར་ཏེ། ད་ལྟའང་འཚོལ་ཞིབ་བྱེད་མུས་ཡིན་འདུག་ལ། ཆུ་ལོག་དེའི་ཁྲོད་བལ་ཡུལ་གྱི་ (Galchhi-Betrawati-Rasuwagadhi)   དང་ (Prithvi) གཞུང་ལམ་ཆེན་པོ་གཉིས་དང་། ཆུ་མཛོད་ཆེན་པོ་བརྒྱད་དང་འཛུགས་སྐྲུན་བྱེད་མུས་ཡིན་པའི་ཆུ་མཛོད་ ༤། དེ་བཞིན། ཟམ་པ་ཆེ་ཆུང་ ༧༩ གཏོར་བརླག་བཏང་བ་སོགས་ཁྱོན་ཨ་སྒོར་ཐེར་འབུམ་ ༤ ནས་ ༥ བར་གྱི་གྱོང་གུན་ཐེབས་ཡོད་པས། བལ་ཡུལ་གཞུང་གིས་མཉམ་འབྲེལ་རྒྱལ་ཚོགས་ལ་ཨ་སྒོར་ས་ཡ་ ༢༠ ཡི་རོགས་སྐྱོར་མ་དངུལ་ཞུས་ཡོད་འདུག

The post བོད་དང་བལ་ཡུལ་གྱི་ས་མཚམས་སུ་བསྐྱར་དུ་རང་བྱུང་གོད་ཆག་བྱུང་། appeared first on བོད་ཀྱི་དུས་བབ།.